«Ауғанстан – сарбаз баяндаған тарих» патриоттық сағат

Шал ақын ауданының орталық кітапханасында Кеңес әскерлерінің Ауғанстаннан шығарылған күніне арналған «Ауғанстан – сарбаз баяндаған тарих» атты патриоттық сағат өтті. Іс-шараның мақсаты – жерлестеріміздің ерлігін есте сақтау, жас ұрпақты ауған соғысының тарихымен таныстыру және сол кезеңдегі оқиғаларды қатысушылардың көзімен көрсету.

Кездесуді кітапханашы Ю.Н. Золотарёва ашып, Отаннан жырақта ауыр сынақтардан өткен сарбаздардың тағдыры туралы тебіреніспен сөз қозғап, тірі тарихты кейінгі ұрпаққа жеткізудің маңыздылығын атап өтті. Қатысушылар Ауғанстанға кеңес әскерлерінің енгізілу себептері мен салдары, соғыс барысының хронологиясы, оның тарихи маңызы мен бүгінгі ұрпақ үшін берер сабақтары туралы мәлімет алды. Ұсынылған материалдар сол бір қасіретті жылдарды тереңірек түсінуге негіз болып, ардагерлермен ашық әңгімеге жол ашты.

Жауынгер-интернационалистер өздерінің жауынгерлік күндері мен қызмет еткен қиын жағдайлар туралы естеліктерімен бөлісті. Е.А. Бөкетов атындағы мектеп-гимназиясы мен К. Салықов атындағы мектептің жоғары сынып оқушылары ардагерлердің әңгімесін зор қызығушылықпен тыңдап, сарбаздардың көптеген қиындықтарды қалай еңсергені жөнінде сұрақтар қойды. Іс-шараға аудандық әскери комиссариаттың қызметкерлері де қатысып, жауынгер-интернационалистерге жас ұрпақты патриоттық тәрбиелеуге қосқан үлестері үшін алғыс білдірді.

Патриоттық сағат аясында «Ауғанстан. Жад жаңғырығы» атты тақырыптық кітап көрмесі ұйымдастырылды. Көрмеге ауған соғысына арналған кітаптар, ардагерлердің естеліктері, тарихи деректер, сондай-ақ оқиғалары әскери операция кезеңінде өрбитін көркем әдеби шығармалар қойылды.

Іс-шара ауған соғысы сарбаздарына арналған әндердің орындалуымен және деректі хроникалардың көрсетілуімен сүйемелденіп, қатысушыларға сол жылдардың атмосферасын терең сезінуге мүмкіндік берді.